Leikni í samskiptum

Á námskeiðinu leiða þau Benedikt og Sóley saman hesta sína og fjalla um samskipti frá mismunandi sjónarhornum, sem þó eiga margt sammerkt.

Sóley fer yfir eiginleika góðra samskipta, tæpir á helstu gryfjum í tjáskiptum og ræðir áhrif hugarfars og væntinga til annarra. Hún kemur inn á leiðir til að bæta tengsl, ná sínu fram, setja mörk og leysa ágreining.

Benedikt fjallar um samskipti út frá einni af frumstæðustu hvötum mannsins, stöðutöku. Í því samhengi fer hann yfir hvernig rödd, líkamsbeiting, staða í rými og orðaval verði að valdatækjum í hinum frumstæða, og oft ómeðvitaða, leik sem við stöndum í daglega.

Markmiðið með námskeiðinu er að þátttakendur verði meðvitaðri um eigin samskiptamynstur, læsari á aðferðir annarra og leiknari í samskiptum.

Hér að neðan má finna orðrétt ummæli þátttakenda námskeiðið sem í síðustu umferð fékk tæplega 9 í meðaleinkunn.
„Mjög góð innsýn í sálfræði samskipta, á báðum kvöldum, frá ólíku sjónarhorni. Sérstaklega gott að fá þessa ólíku nálgun um sama fyribærið með stuttu millibili”
„Mér fannst vera margir skemmtilegir punktar eins og hár innri status og tengt því. Svo voru æfingarnar líka skemmtilegar”.
„Gott að fara yfir samskiptamynstur út frá sálfræðinni. Kveikti á ýmsu sem áður var svolítið fast að ætti ekki að kafa ofan í”.
„Svo gott, fræðilegt og praktískt líka”.
„Gott að spegla sig í ólíkum aðstæðum. Lærdómur að skoða hvernig mér leið í berskjaldandi aðstæðum þegar átti (þeir sem vildu) að leika hlutverk”.
„Mjög gagnlegt og áhugavert. Hefur hjálpað mér að fá aukna innsýn í eigin samskipti, aukið öryggi. Mun hiklaust mæla með námskeiðinu við aðra. Nýtist í starfi og leik”.
„Já, gerði mig öruggari”.
„Mjög gaman, gleðin skiptir miklu máli. Sterkt að byrja á fyrirlestri sálfræðings og taka verkfæri leiklistarinnar fyrir seinni daginn”.
„Það veitti mér innsýn í samskipti mín út frá fyrra sambandi og hjálpaði mér að sjá eineltishópa sem ég hef lent í í gegnum tíðina”.

Um er að ræða 4 klst námskeið á formi fyrirlestra og léttra æfinga fyrir þá sem kjósa. Þátttakendur fá lesefni um samskipti.

30.000.-

18. og 19. mars kl. 17.00-19.00 í húsnæði Kvíðameðferðarstöðvarinnar