Næsti hópur hefst haustið 2023 – nákvæmari tímasetning kemur fljótlega.
Námskeiðið er einu sinni í viku í sex vikur. Námskeiðið er ætlað fólki sem er úrvinda eftir langvinnt álag og finnur fyrir eftirfarandi einkennum:
- minnistruflunum og einbeitingarerfiðleikum
- erfiðleikum með að standast kröfur og álag
- streitu eða óróleika
- skapsveiflum eða pirringi
- svefntruflunum
- þreytu og úthaldsleysi
- líkamlegum óþægindum
Á námskeiðinu er farið yfir einkenni og stig kulnunar og fjallað um hvernig megi draga úr þessum einkennum og bæta líðan. Meðal annars er farið yfir hvernig draga megi úr streitu, endurheimta líkamlegt og andlegt þrek, bæta tímastjórnun og huga að gildum í lífinu; skoða hvað skipti mann máli og haga sér í samræmi við það. Einnig er fjallað um samskipti á vinnustað og hvernig megi bæta þau; hafa tjáskiptin skýrari og setja mörk þegar við á. Fjallað er um jafnvægi virkni og hvíldar og mikilvægi ánægjulegra og endurnærandi athafna.
Námskeiðið stendur yfir í sex vikur auk eftirfylgdartíma, tvo tíma í senn og kostar þátttaka í þessu alls 14 klukkutíma námskeiði 81.000 krónur. Stéttarfélög kunna að koma að niðurgreiðslu námskeiðsins. Ekki er þörf á sérstöku matsviðtali áður en námskeiðið hefst og fer skráning á námskeiðið fram á kms@kms.is. Námskeiðinu er stýrt af reyndum sálfræðingum við Kvíðameðferðarstöðina sem hafa reynslu af meðhöndlun kulnunar og streitu.
Hér að neðan má sjá ummæli síðasta hóps sem gaf námskeiðinu að meðaltali 8,8 í einkunn.
„Fullt af verkfærum sem hægt er að mæla með. Kvíðinn hefur næstum horfið, þarf að vinna í depurð, þreytu”
„Opnaði augu mín fyrir því hvað kulnun er. Ýmis tól á námskeiðinu sem munu nýtast vel”
„Námskeiðið á margan hátt gagnlegt, passa að virða mín mörk, sef betur og pæli mikið í hvernig ég ver tímanum”
„Gagnleg flokkunin í ytri og innri streituvalda, mörg góð ráð, m.a. við svefn og streitustjórnun”.
„Gagnleg umfjöllunin um fullkomnunaráráttuna, að gera to-do lista, skipuleggja sig, að það megi segja nei”.
„Gaf verkfæri til að vinna með”.
„Gagnlegt að sjá að kulnun tengist bæði ytra og innra áreiti. Gagnlegt að læra um verkfærin til að takast á við mismunandi aðstæður”.
„Góð blanda af glærum og umræðum”.
„Fræðsla varðandi grufl var góð, svefn, tímastjórnun”.
„Gott að læra um grufl, setja mörk og segja nei. Að mega slæpast, þurfa ekki að vera fullkominn”.