Styrkur og sátt -karlanámskeið

Home / Námskeið / Styrkur og sátt -karlanámskeið

Næsta námskeið hefst mánudaginn 23. október kl. 13-15.

Námskeiðið er ætlað karlmönnum sem vilja efla öryggi og áræðni. Námskeiðið er sniðið að þörfum karlmanna en þeir eiga oft erfitt með að leita sér aðstoðar og finna sig síður á námskeiðum þar sem konur eru í miklum meirihluta.

Óöryggi og sjálfsefasemdir geta haft veruleg áhrif á líf karla og gert það að verkum að þeir eiga erfiðara með að hasla sér völl á vinnumarkaði, í námi og samböndum. Opin og gefandi samskipti geta reynst þeim erfið og sumir draga sig í hlé og líður illa innan um aðra.  Aðrir leitast við að gera öðrum til geðs, standa sig afburðavel í því sem þeir taka sér fyrir hendur en ná sjaldnast að slaka á og njóta árangursins. Enn aðrir eru fljótir að gefast upp þegar á mót blæs, þar sem þeir hafa ekki trú á að þeir geti náð markmiðum sínum.  Ýmsar óþægilegar tilfinningar fylgja iðulega neikvæðri sjálfsmynd, svo sem depurð, pirringur, skömm og kvíði.

Á námskeiðinu er þátttakendum kennt að þekkja neikvæð viðhorf til sjálfs sín og viðbrögðin sem þróast hafa samhliða. Áhersla er lögð á að breyta þessum viðbrögðum, t.d. með aukinni áræðni, og finna jákvæð áhrif þess í leik og starfi. Meðal annarra atriða sem verða sérstaklega til umræðu eru tengsl hugsana, tilfinninga og hegðunar, árvekni, sátt, áræðni, staða karlmannsins í samfélaginu í dag og lífsgildi.

Hér á eftir fer stutt lýsing á námskeiðinu:

  • Inngangur og kynning. Sjálfsmynd karla.
  • Tilfinningar, hugsanir og hegðun.
  • Grunnhugmyndir og lífsreglur/viðbrögð.
  • Lífsreglur prófaðar með atferlistilraunum.
  • Áframhald á atferlistilraunum.
  • Samskipti og að setja mörk
  • Sátt og skilningur
  • Gestafyrirlestur – lífsleikni
  • Lífsgildi og áræðni

X. Lokatími (fjórum vikum eftir 9. tímann). Samantekt.

Þátttaka í þessu 20 klukkustunda námskeiði kostar 75.000. Sjúkrasjóðir stéttarfélaga kunna að niðurgreiða námskeiðið en matsviðtal, sem er mikilvægur undanfari námskeiðs, er ekki innifalið í námskeiðsverðinu. Í matsviðtalinu er vandi hvers og eins kortlagður og skoðað hvort námskeiðið komi að gagni eða hvort önnur úrræði gagnist betur.
Matsviðtal kostar 15.000 kr.

Smelltu hér ef þú vilt bóka matsviðtal fyrir þetta námskeið. Vinsamlegast tilgreindu undir skilaboð hvaða námskeið þú óskar eftir.

Vanti þig frekari upplýsinga um námskeiðið eða ef þú vilt skrá þig símleiðis getur þú gert það í síma 534 0110 eða senda tölvupóst á kms@kms.is